ಗೀತೆ ಏನನ್ನು ಬೋಧಿಸುತ್ತದೆ..?

ಗೀತೆ ಏನನ್ನು ಬೋಧಿಸುತ್ತದೆ..?ಹಲವರಿಗೆ ಗೊತ್ತೇ ಇಲ್ಲ..!!ಹಲವರಿಗೆ ತಿಳಿದುಕೊಳ್ಳುವ
ಅವಶ್ಯಕತೆಯಿಲ್ಲ..!!ಹಲವರಿಗೆ ಗೀತೆ ಕೇವಲ ಮನುವಾದಿಗಳಿಗಷ್ಟೇ ಸೀಮಿತ..!!ಹಲವರಿಗೆ
ಗೀತೆ ವಿವಾದ..!!ಕೆಲವರಿಗೆ ಸಂಸ್ಕೃತ ಬರುವುದಿಲ್ಲ..!!ಕೆಲವರಿಗೆ ಅರ್ಥವಾಗದ ಕಬ್ಬಿಣದ
ಕಡಲೆ..!!ಹಲವರದು ಗೀತೆ ಆಧ್ಯಾತ್ಮದ ಬಗ್ಗೆ ಆಸಕ್ತಿಯಿರುವವರಿಗೆ ಮಾತ್ರ ಎಂಬ
ಭಾವನೆ..!!ಹಾಗಾಗಿ ಗೀತೆಗೆ ಇಂದಿಗೂ ಜನಮನ್ನಣೆ ಸಿಕ್ಕಿಲ್ಲ.ಗೀತೆಯನ್ನು ಆಳವಾಗಿ
ಅಧ್ಯಯನ ಮಾಡುವವರಿಲ್ಲ.ಸಕಲ ಶಾಸ್ತ್ರದ ಸಾರವಾಗಿರುವ ಗೀತೆ ಇಂದಿಗೂ ಹಲವರಿಗೆ
ಅಸ್ಪೃಶ್ಯ..!!

ಗೀತೆ ಕೇವಲ ಆಧ್ಯಾತ್ಮಕ್ಕಷ್ಟೇ ಸೀಮಿತವೇ..?ಖಂಡಿತ ಅಲ್ಲ.ಬದುಕಿನ ಎಲ್ಲ ವಿಷಯಗಳನ್ನೂ
ಒಳಗೊಂಡಿರುವ ಗೀತೆ ಒಂದು ಆಚಾರಸಂಹಿತೆ.ಮನುಷ್ಯನ ಬದುಕು ಹೇಗಿರಬೇಕೆಂದು ತಿಳಿಸುವ
ಕೈಪಿಡಿ.ಗೀತೆಯನ್ನು ಸರಿಯಾಗಿ ಓದಿ ಅರ್ಥಮಾಡಿಕೊಂಡು ಗೀತೆಯ ತತ್ವವನ್ನು ಬದುಕಿನಲ್ಲಿ
ಅನುಸರಿಸಿದರೆ ಆ ವ್ಯಕ್ತಿಯ ಬಾಳು ಯಶಸ್ವಿಯಾಗುವುದರಲ್ಲಿ ಯಾವುದೇ
ಅನುಮಾನವಿಲ್ಲ.ನಿತ್ಯ ಬದುಕಿಗೆ ಗೀತೆ ಹೇಗೆ ಅವಶ್ಯಕ..?ಒಂದು ಉದಾಹರಣೆಯನ್ನು ನೋಡೋಣ..

ಆಹಾರದಿಂದಲೇ ನಮ್ಮ ದೇಹಕ್ಕೆ ಶಕ್ತಿ ಸಿಗುತ್ತದೆ.ಶರೀರದ ಆರೋಗ್ಯ ಚೆನ್ನಾಗಿರಬೇಕೆಂದರೆ
ಸೇವಿಸುವ ಆಹಾರವೂ ಚೆನ್ನಾಗಿರಬೇಕು.ಆಹಾರವನ್ನು ಜಾಸ್ತಿ ಅಥವಾ ಕಡಿಮೆ
ಸೇವಿಸಬಾರದು.ಜಾಸ್ತಿ ಆಹಾರ ಅಥವಾ ಕಡಿಮೆ ಆಹಾರವನ್ನು ಸೇವಿಸುವುದರಿಂದ ಶರೀರದಲ್ಲಿ
ಅನಾರೋಗ್ಯವುಂಟಾಗುತ್ತದೆ.ಇದನ್ನೇ ಭಗವದ್ಗೀತೆಯ ಆರನೇ ಅಧ್ಯಾಯದ ೧೬ ನೇ ಶ್ಲೋಕದಲ್ಲಿ
ಶ್ರೀಕೃಷ್ಣ ಅರ್ಜುನನಿಗೆ ಹೇಳುತ್ತಾನೆ..

"ನಾತ್ಯಶ್ನತಸ್ತು ಯೋಗೋಸ್ತಿ ನ ಚೈಕಾಂತಮನಶ್ನತಃ |
ನ ಚಾತಿಸ್ವಪ್ನಶೀಲಸ್ಯ ಜಾಗ್ರತೋ ನೈವ ಚಾರ್ಜುನ ||"

ಅಂದರೆ,ಯಾರು ಜಾಸ್ತಿ ಆಹಾರವನ್ನು ಸೇವಿಸುತ್ತಾರೋ ಅವರು ತಮ್ಮ ಲಕ್ಷ್ಯದತ್ತ
ಸಾಗಲಾರರು.ಯಾರು ಕಡಿಮೆ ಆಹಾರವನ್ನು ಸೇವಿಸುತ್ತಾರೋ ಅವರೂ ಸಹ ತಮ್ಮ ಲಕ್ಷ್ಯದತ್ತ
ಸಾಗಲಾರರು.ಹಾಗಾಗಿ ಆಹಾರವನ್ನು ಸಮಪ್ರಮಾಣದಲ್ಲಿ ಸೇವಿಸಬೇಕು.ನಮ್ಮ ವೈದ್ಯಕೀಯ
ವಿಜ್ಞಾನ ತಿಳಿಸುವುದು ಇದನ್ನೇ ತಾನೇ..?ಅಪರಿಮಿತ ಆಹಾರವನ್ನು ಸೇವಿಸುವುದರಿಂದ
ಅಜೀರ್ಣ,ಆಸಿಡಿಟಿ,ಬೊಜ್ಜು,ಕೊಬ್ಬು ಮುಂತಾದ ಸಮಸ್ಯೆಗಳು ಬರುತ್ತವೆ.ಅತಿ ಕಡಿಮೆ
ಆಹಾರವನ್ನು ಸೇವಿಸುವುದರಿಂದ ಅಶಕ್ತತೆ,ಉದರಸಂಬಂಧಿ ರೋಗಗಳು,ರಕ್ತಹೀನತೆ ಮುಂತಾದ
ಖಾಯಿಲೆಗಳು ಬರುತ್ತವೆ.ಹಾಗಾಗಿ ಆಹಾರವನ್ನು ಅತಿಯಾಗಿ ಸೇವಿಸಬಾರದು,ಕಡಿಮೆಯೂ
ಆಗಬಾರದು.ಸಮಪ್ರಮಾಣದಲ್ಲಿ ಸೇವಿಸಿದಾಗಷ್ಟೇ ವ್ಯಕ್ತಿ
ಆರೋಗ್ಯವಂತನಾಗಿರುತ್ತಾನೆಂಬುದನ್ನು ಭಗವಂತ ಅದೆಷ್ಟೋ ಸಾವಿರ ವರ್ಷಗಳ ಹಿಂದೆಯೇ
ತಿಳಿಸಿದ್ದಾನೆ.

ಹಾಗೇ ಅವಶ್ಯಕತೆಯಿದ್ದಷ್ಟೇ ನಿದ್ರೆ ಮಾಡಬೇಕೆಂದು ಶ್ರೀಕೃಷ್ಣ ತಿಳಿಸುತ್ತಾನೆ.ಜಾಸ್ತಿ
ನಿದ್ರೆಯಿಂದ ಶರೀರ ಆಲಸ್ಯವನ್ನು ಹೊಂದುತ್ತದೆ.ಕಡಿಮೆ ನಿದ್ರೆಯಿಂದ ದೇಹ
ಬಲಹೀನತೆಯನ್ನು ಹೊಂದುತ್ತದೆಂದು ತಿಳಿಸಿದ್ದಾನೆ.ಆದ್ದರಿಂದ ನಿದ್ರೆಯೆಷ್ಟು
ಅವಶ್ಯಕತೆಯಿದೆಯೋ ಅಷ್ಟು ಸಮಯ ಮಲಗಬೇಕು.ಆರೋಗ್ಯವಂತ ವ್ಯಕ್ತಿಗೆ ಆರರಿಂದ ಎಂಟು
ಘಂಟೆಯಷ್ಟು ನಿದ್ರೆ ಸಾಕು.ಅದಕ್ಕಿಂತ ಜಾಸ್ತಿ ಮಲಗಿದರೆ ಹಲವು ವಿಧದ ರೋಗಗಳು
ಕಾಡಬಹುದು.

ಅದನ್ನೇ ಭಗವಂತ ತಿಳಿಸುತ್ತಾನೆ..

"ಯುಕ್ತಾಹಾರವಿಹಾರಸ್ಯ ಯುಕ್ತಚೇಷ್ಟಸ್ಯ ಕರ್ಮಸು |
ಯುಕ್ತಸ್ವಪ್ನಾವಬೋಧಸ್ಯ ಯೋಗೋ ಭವತಿ ದುಃಖಹಾ ||(ಭಗವದ್ಗೀತೆ ೬-೧೭)

ಅಂದರೆ ನಾವು ಯಾವುದನ್ನು ತಿನ್ನುತ್ತೇವೋ ಅದು ಆಹಾರ.ಆಹಾರ ಸೇವನೆಯ ನಂತರ ನಡೆಯುವುದು
ವಿಹಾರ.ಯಾವ ವ್ಯಕ್ತಿಯ ಆಹಾರ ಹಾಗೂ ವಿಹಾರ ಸಮರ್ಪಕವಾಗಿರುತ್ತದೆಯೋ ಅಂತಹ ವ್ಯಕ್ತಿ
ಸದಾ ಆರೋಗ್ಯವಂತನಾಗಿರುತ್ತಾನೆ.ಆತ ಜೀವನದಲ್ಲಿ ಸಫಲತೆಯನ್ನು
ಪಡೆಯುತ್ತಾನೆ.ಆಹಾರ,ವಿಹಾರಗಳಲ್ಲಿ ಅಸಮತೋಲನವುಂಟಾದರೆ ವ್ಯಕ್ತಿ ಅನಾರೋಗ್ಯದ ಕೂಪಕ್ಕೆ
ಬೀಳುತ್ತಾನೆ.ಅಸ್ವಸ್ಥ ವ್ಯಕ್ತಿ ಎಂದಿಗೂ ಸುಖವನ್ನು ಪಡೆಯಲಾರ ಎಂಬುದು ಭಗವಂತನ
ಅಭಿಪ್ರಾಯವಾಗಿದೆ.

"ಉಂಡು ನೂರಡಿ ತಿರುಗು" ಎಂಬ ಗಾದೆ ಮಾತಿದೆ ತಾನೇ..?ಊಟವಾದ ತಕ್ಷಣ ಮಲಗುವುದು
ಸರಿಯಲ್ಲವೆಂದು ಆಧುನಿಕ ವಿಜ್ಞಾನವೂ ಪ್ರತಿಪಾದಿಸುತ್ತದೆ.ಆದರೆ ಗೀತೆಯಲ್ಲಿ
ಆಹಾರ-ವಿಹಾರಗಳ ಕಲ್ಪನೆ ಸಾವಿರಾರು ವರ್ಷಗಳ ಹಿಂದೆಯೇ ಭಗವಂತನಿಂದ
ಹೇಳಲ್ಪಟ್ಟಿತ್ತು...!!

"ಯದಾ ವಿನಿಯತಂ ಚಿತ್ತಂ ಆತ್ಮನ್ಯೇವಾವತಿಷ್ಠತೇ |
ನಿಃಸ್ಪ್ರೃಹಃ ಸರ್ವಕಾಮೇಭ್ಯೋ ಯುಕ್ತ ಇತ್ಯುಚ್ಯತೇ ತದಾ ||"

ಈ ಶ್ಲೋಕದ ಅನುಸಾರ,ಯಾವ ವ್ಯಕ್ತಿಯ ಮನಸ್ಸು ನಿಯಂತ್ರಣದಲ್ಲಿರುತ್ತದೆಯೋ ಹಾಗೂ
ಭಗವಂತನನ್ನೇ ಸ್ಮರಿಸುತ್ತಿರುತ್ತದೆಯೋ ಅಂತಹ ವ್ಯಕ್ತಿ ಭೋಗ-ಸುಖ-ದುಃಖಗಳಿಂದ
ವಿಮುಖನಾಗುತ್ತಾನೆ.ಇಂತಹ ವ್ಯಕ್ತಿಗಳು ಜೀವನದ ಪ್ರತಿಯೊಂದು ಕ್ಷಣದಲ್ಲೂ
ಸಮಚಿತ್ತದಿಂದಿರುತ್ತಾರೆ.ಸುಖೋಪಭೋಗಗಳ ವ್ಯಾಮೋಹ ದೂರವಾಗಿರುತ್ತದೆ.ಹಾಗಾಗಿ ನಾವೂ ಸಹ
ನಮ್ಮ ಮನಸ್ಸನ್ನು ನಿಯಂತ್ರಣದಲ್ಲಿಡಲು ಯತ್ನಿಸಬೇಕು.ಧ್ಯಾನ ಹಾಗೂ ಯೋಗಗಳಿಂದ ಮನಸ್ಸಿನ
ನಿಯಂತ್ರಣವನ್ನು ಸಾಧಿಸಬಹುದು.ಆದ್ದರಿಂದ ಪ್ರತಿದಿನ ಮುಂಜಾನೆ ಅಥವಾ ಸಾಯಂಕಾಲ
ಧ್ಯಾನವನ್ನು ಮಾಡಬೇಕು.ಇದರಿಂದ ಮನಶ್ಶಾಂತಿ ಸಿಗುತ್ತದೆ.

ಹೀಗೆ ಭಗವದ್ಗೀತೆ ಕೇವಲ ಆಧ್ಯಾತ್ಮಕ್ಕಷ್ಟೇ ಸೀಮಿತವಲ್ಲ.ಮನುಷ್ಯನ ಶಾರೀರಿಕ ಹಾಗೂ
ಮಾನಸಿಕ ಆರೋಗ್ಯಕ್ಕೂ ಸಹಕಾರಿ.ಭಗವದ್ಗೀತೆಯ ತತ್ವಗಳನ್ನು ಓದಿ ಅರ್ಥಮಾಡಿಕೊಂಡು
ಬದುಕಿನಲ್ಲಿ ಅಳವಡಿಸಿಕೊಳ್ಳಬೇಕಾದ್ದು ಸನಾತನ ಧರ್ಮೀಯರಾದ ನಮ್ಮ ಆದ್ಯ ಕರ್ತವ್ಯ.